84 | Yehova Na Balama | యెహోవా నా బలమా | Calvary Temple

పల్లవి: యెహోవా నా బలమా - యధార్థమైనది నీ మార్గం 

పరిపూర్ణమైనది నీ మార్గం ॥యెహోవా॥

1. నా శత్రువులు నను చుట్టినను - 

నరకపు పాశము లరికట్టినను 

వరదవలె భక్తిహీనులు పొర్లిన 

విడువక నను యెడబాయని దేవా ॥ యెహోవా॥

2. మరణపు టురులలో మరువక - మొరలిడ 

ఉన్నత దుర్గమై రక్షణ శృంగమై - 

తన ఆలయములో నా మొరవినెను 

ఆదరెను ధరణి భయకంపముచే ॥యెహోవా॥

3. పౌరుషము గల ప్రభు కోపింపగా 

పర్వతముల పునాదులు వణకెను - 

తన నోట నుండి వచ్చిన యగ్ని 

దహించి వేసెను వైరులనెల్లన్ ॥యెహోవా॥

4. మేఘములపై ఆయన వచ్చును 

మేఘములను తన మాటుగా జేయును 

ఉరుములు మెరుపులు మెండుగ జేసి 

అపజయమిచ్చును అపవాదికిని ॥యెహోవా॥

5. దయగల వారిపై దయ జూపించును - 

కఠినుల యెడల వికటము జూపును - 

గర్విష్టుల యొక్క గర్వమునణచును 

సర్వము నెరిగిన సర్వాధికారి ॥యెహోవా॥

6. నా దీపమును వెలిగించువాడు 

నా చీకటిని వెలుగుగ జేయును 

జలరాసులనుండి బలమైన చేతితో 

వెలుపల జేర్చిన బలమైన దేవుడు ॥యెహోవా॥

7. నా కాళ్ళను లేడి కాళ్ళుగ జేసి - 

ఎత్తైన స్థలములో శక్తితో నిలిపి 

రక్షణ కేడెము నాకందించి 

అక్షయముగ తన పక్షము జేర్చిన ॥యెహోవా॥

8. యెహోవా జీవముగల దేవా 

బహుగా స్తుతులకు అర్హుడ నీవు - 

అన్యజనులలో ధన్యత జూపుచు 

హల్లెలూయ స్తుతి గానము జేసెద ॥యెహోవా॥